Free Movement Regime (FMR) chungchang sawi dawn

Hmarchhak state zinga Myanmar nen a ramri inṭawmte chuan sorkar laipuiin zalen taka Indo-Myanmar ramri intlawhtawn theihna a tihtawp chungchang chu sawiho an tum tih Nagaland deputy chief minister Y Patton chuan a sawi.

Kohima-a police headquarters-a thuthar thehdarhtute a kawmnaah Patton chuan Indo-Myanmar ramria state awm zinga hruaitute chu inhmuh khawm vat an tum thu leh, sorkar laipui hmalaknaa an ngaihdan chiang taka tarlan an tum thu a sawi. Nagaland Dy. CM hian ṭhut khawm hun tur chu chiang takin a tarlang lo a, Nagaland sorkarin a la ngaihtuah tur thu a tarlang.

Nagaland Director General of Police (DGP) pawhin sorkar laipui chuan thutlukna siam tawh mah se, state sorkar chuan ramri leh FMR chungchangah an ngaihdan an thawh ve dawn thu te, state police-te pawhin ramria khuahkhirhna ṭha zawk a awm theih nan thurawn an pek ṭhin thu a sawi. DGP chuan ramri ven ṭhat chu ram chhung him nan pawimawh viau mah se, ramri bul hnaia chengte ngaihdan leh pawm theih china khuahkhirh a pawimawh thu a sawi a ni.