Bharat Jodo Nyay Yatra neihna hmuna inbeihna thleng enfiah phut

Assam Pradesh Congress Committe chuan Pathiannia Bharat Jodo Nyay Yatra, Sonitpur district-a neih zawh taka APCC President Bhupen Kumar Borah beih a nih chungchang chu thuneitute chhui chian an phut.

APCC media cell chuan thuchhuah siamin, BJP mi leh sa ni ngeia hriat misualte chuan Bhupen Borah leh Hiroy Das-te chu an beih thu leh, hliam an tawrh thu an sawi. APCC chuan hetiang pawikhawihna hi an dem thu leh thleng nawn tawh lo se an duh thu an sawi a ni. BJP leh a kaihhruai sorkar chu Yatra hlawhtlinna hian a timangang hle a, hemi tichiangtu chu BJP activist-te'n Congress hruaitu hlun Jairam Ramesh tharum hmanga beih an tum leh hian a tihchian thu an sawi. Congress party hian Jamugurihat Police Station-ah an hruaitu pahnihin beih an tawh avang hian FIR an theh lut tawh.

Congress party hian BJP MLA leh hruaitu Padma Hazarika chu tharum thawhnaah hian a inhnamhnawih ngei nia an hriat thu an sawi. "MLA hi he inbeihnaah hian a inrawlh ngei niin kan hria a, chuvangin Congress party chuan police-ah rinna nghah harsa kan tih avangin court-in a chhui chian kan phut a ni. Assam sorkar chu he thil thleng chhui tura darkar 24 kan pek hnuah pawh hmalakna engmah a awm tak si loh avangin Congress chuan duhthlan tur dang a neih tawh loh avangin inbeihna duh loh lantirna neih kan tum" an ti.

Tharum thawhtu misualte chu an hlauh loh thu leh, Yatra neih mek tihbuai tum zawng a hmalaknate chuan party worker-te chu a tihphur zawk thu te, hei hian Yatra neih mek chu hlawhtling taka an zawh theih nan kawng ro a sut tur thute Congress chuan an sawi.