Assam inthlanah vote 78.06% a tla

Thawhṭanni khan Assam state election thawh khatna chu zawh a ni ta a, vote a tla ṭha thawkhat hle.

Inthlan thawh khatnaa vote tla hi 78.06% a ni a, buaina leh harsatna lian tham lutuk thleng a awm loin constituency 65-ah inthlan thawh khatna hi zawhfel a ni.

Election Commission data aṭanga a lan dan chuan vote thlak ni tlai lam dar 6.52 thleng khan vote tla hi 78.06% a ni a, hmun ṭhenkhat kil khawr lama vote tlak dan chanchin hriat kim theih a la nih loh avangin vote tla zat hi la pung leh tura ngaih a ni. Chabua LAC chu vote tlak
ṭhatna ber niin 85.19% a tla a, hetih lai hian vote tlak chhiatna ber Sarupathar LAC-ah chuan 67% chiah a tla thung.

Additional Chief Electoral Officer Nitin Khade chuan result kimchang tih chhuah leh tur a nih thu a sawi. Hmun hrang hrang aṭangin report an la dawn belh zel a, hmun ṭhenkhatah chuan hun tiam chhunga vote thlak hman lo mi eng emaw zat an awm tih a sawi bawk.

Inthlan thawh khatna-ah hian buaina chhuak leh inthlan ṭhat ngaihna hmun a awm lo niin report chuan a tarlang a, boruak muanawm tak hnuaiah inthlan hi neih a ni. Polling station pasarih-ah Electronic Voting Machines (EVMs) chian loh avangin thlak a ni a, rang taka siamṭhat leh nghal a ni. Vote thlak hi zing dar 7 atangin ṭan a ni a, tlai lam dar 5 thleng hawn a ni. Pianphunga rualban lo, vote thlak duhte tan state sorkar chuan inthlan neih hma hian ruahmanna felfai tak a siam sa bawk a ni.

Election Commission report-a tarlan a nih danin hmun ṭhenkhatah chuan chawhnu dar khat khan vote tla zat hi 50% a tling hman a, hun tiam chhunga vote thlak hman lo eng emaw zat an awm bawk.

Candidate zingah hian Chief Minister Tarun Gogoi, BJP chief ministerial candidate Sarbananda Sonowal, AGP chief Atul Bora, Speaker Pranab Gogoi, ministers Gautam Roy, Ajanta Neog leh Pranati Phukan te chu mipui ngaihven zualte an ni. Constituency 65 te hi Upper Assam, North Bank, Hill districts leh Barak Valley huam chhunga mi an ni.

Vote tla zawng zawng hi 95,11,732 a ni a, chung zinga 49,16,015 mipa an ni a, hmeichhe vote thlak 45,95,712 an awm bawk. Candidate 539 candidates zinga 43 chu hmeichhia an ni a, an zingah hian mihausa leh thilti thei tak tak an awm nuk a ni.

BJP chuan candidate 52 a nei a, Congress (65), NCP (9), CPI (10), CPM (10), AGP (11), AIUDF (27), BPF (3) leh Independent bakah party te nau candidate te an awm bawk. Inthlan thawh khatna-ah hian polling stattion 12,190 a awm a, EVM leh VVPAT hman a ni a, inthlan thawh hnihna hi April 11-ah neih leh a ni ang.

Chief Minister Tarun Gogoi chuan kum 2011 inthlanpui ai khan an chet ṭhat a rin thu a sawi a, vote nei thar tam tak te chuan an party an thlawp niin a sawi. Gogoi hian sorkarna an siam leh ngei dawn tih sawiin, mipuite tana thawh chu an party thil tum ber pakhat a ni, a ti. Sorkar laipuia sorkarna chang mek NDA chungchang pawh sawilangin, Gogoi chuan an state chu Congress lalna a nih vangin Modi-a sorkar chuan kawng tam takah a ngaihthah niin a sawi a, hmasawnna kawng daltu ang hialin a chhuah a ni.

Hetih lai hian BJP Chief Ministerial candidate Sarbananda Sonowal pawhin media te hmaah thu sawiin, a dinna Dibrugarh mipuite chungah lawmthu a sawi. Mipuite chuan sorkar thar din an duh tawh niin a sawi a, BJP chu party mala chak ber tur an nih thu a sawi bawk.