District tinah commercial court din dawn

Tripura sorkar chuan an state chhunga district awm zawng zawng, district pariatah commercial court din vek a tum. Hmarchhak state pariat zingah Tripura hi commercial court din thei hmasa ber a ni dawn a ni.

Nikum December thlaa parliament in a pass leh, kumin Januarty thla aṭanga hman ṭan High Courts Bill, 2015 chuan commercial court hian sumdawnna lam thubuai, cheng vaibelchhe khat leh a chunglam huam chin buaipui turin a ti a ni.

State law secretary, AK Nath chuan, "Tripura High Court hnenah district pariat-a commercial court dinna tura hriattirna hi tichhuak turin kan ngen a ni" a ti. Tripura-a district pariat zinga panga hian district court an nei tawh a, a dang pathumah hian additional district court an awm. Tripura High Court hian commercial court din pawh hi a remti vek tawh niin Nath chuan a sawi.

Sumdawnna lam thubuai, commercial court-a ngaihtuah turte hi a rei berah thla 18 chhunga chinfel hman vek tura tih a ni.