Assam CM-in Rahul Gandhi chetdan a chhui chiantir dawn

Assam-a Bharat Jodo Nyay Yatra neih mek chu a boruak sosang zel a, Assam chief minister Himanta Biswa Sarma chuan Rahul Gandhi chu mipui, a diklo zawnga hruaikawi nia puhin state police-te chu thubuai ziak lut turin a ti.

Chief Minister chuan Rahul Gandhi leh Congress worker-te chetdan chu a dem thu X-ah ziakin,"Hetianga chet hi Assam chindan ṭhin a ni lo. State ralmuang tak kan ni a, naxal-te chetdan niawm taka chet hi kan state tan chuan thil thar a ni" tiin, Assam police-te chu Rahul Gandhi laka thubuai ziak lut tura thu a pek thu a sawi bawk.

Assam sorkar hian tun hnai khan Guwahati chhunga kawngpui pawimawh tak takah Yatra neih hi a phal lo a, khawpui chhunga mipui chetvelnaah harsatna a thlen an hlauh vang a nih thu an sawi. Hei vang hian Congress mi leh sate chu kawngpui lun lo zawk NH-27 lamah Yatra chu kalpui turin an ti a ni.

Hetih lai hian Rahul Gandhi chuan,"He kawngpui hi Bajrang Dal-te zawh hnu, JP Nadda-te'n rally an lo neih tawhna hmun tho a ni. He kawngpui hi hung ni mah se a hungnate chu kan ṭhiat a, mahse, dan kan bawhchhe lo. Mi chak lo takah min ngai suh u, Congress mi leh sate hi an chak ṭha a ni" a ti. Rahul Gandhi leh Congress mi leh sa tam tak, Guwahati luh tumte chu thuneitute'n an lo dan avangin harsatna an tawk a, Congress lamin an Yatra chhunzawm an tum chu police nen an innawr buai a, dan lekkawhtu lam hian tiang hmangin mipui pung khawmte chu hnawh darh an tum a ni. Rahul Gandhi chuan mipui pung khawm hmaah thu sawiin, tharum thawh loh chu an thupui ber a la nih reng thu a sawi.