Tripura : Bru-te'n ration dawn ṭhat loh vangin kawngpui dang

Tripura-a Dhalai district-ah Bru chhungaw tam takin ration an dawn ṭhat loh avanga lungawi lohna lantirin kawngpui an dang a, hei vang hian Ambassa-Ganda Twista kawngpui-a lirthei veivakte'n harsatna an tawh phah a ni.

Bru-te hian an chenna tura an ruahmansak, khaw thar pahnih Kananta Para leh Jagabandhu Kasrai Para-a chhungkua zawng zawngte chuan kham khawp ration an dawn loh thu sawiin, a rang thei ang bera an harsatna sutkian an phut thu an tarlang.

Nawrh huaihawt zinga pakhat chuan,"January 2020-a inremna ziah angin Bru raltlan chhungkaw 674 aṭangin mi 3,494-te chu khaw thar pahnihah an inbengbel a, khaw thar luah luh hnu hian kum khat leh thla li ral tawh mah se, thla tina pension lak tur kan neih chu tihfel a la ni lo a, thla nga liam ta chhung khan tu chhungkua mahin an dawng lo a ni," a ti. Nawrh huaihawtte hian an thil phut tihhlawhtlin a nih hma chu ṭin darh mai an tum loh avangin buaina nasa zawk a chhuah loh nan nawrh huaihawtna hmunah hian police tirh an ni.

Bru hotu pakhat chuan an buaina bulpui ber chu ration supply ṭha lo chu a nih thu sawiin, mi 3,494 zinga 1,458 chiah chu hamṭhatna dawng thei tur zingah an hming tarlan a ni a, a ti. Online hmanga Public Distribution System hi kalpui a nih tawh avangin hming chuang ve lote chuan ration hi an dawn ve theih loh thu a sawi a, he an buaina hi a rang thei ang bera chinfelsak tura thuneitute an phut thu a sawi.

Tripura-a raltlan, Bru hnamte hi North Tripura district-ah refugee camp parukah dah ṭhin an ni. Heng camp-a awmte inbenbelna tur hi sorkar chuan siamin, hmun hrang hrangah sawn an ni hlawm a ni.