Meghalaya : Laitumkhrah-a kawng sir dawrte sawn chhuak vek dawn

Meghalaya cabinet minister, Ampareen Lyngdoh chuan February 10-15, 2024 inkarah Shillong khawpuia Laitumkhrah police point leh beat house inkar kawng sira dawr nei zawng zawngte chu sawn chhuah an nih tur thu a sawi.

Ampareen Lyngdoh hian Laitumkhrah Dorbar Shnong leh sorkar department hrang hrangte nen meeting an neih hnua he thutlukna hi siam an nih thu sawiin, dawr sawn chu helai hmun tihthawlna tur leh, kawng hmangtu mipuite himna atana ti an nih thu a sawi. "Ruahmanna siamin kan inpeih tawh a, dawrte sawn chhuah hna hi kan kalpui vat ang. Hei hi national vendors/hawkers policy inkaihhruaina dan pawh a ni", tiin, an ruahmanna siam chu vantlang ṭhatna tur leh mipuite tan a nih thu a sawi. Lyngdoh hian hawkers act an ṭanchhan avanga dodalna an tawh tam loh a beisei thu sawiin, dawr neite leh an pawl chuan ruahmanna chu an zawm ngei a duh thu a sawi bawk.

Laitumkhrah police point leh beat house inkar hi kawng sir dawr awm lohnaa siam tum a nih rual hian ring road siam ṭhat tum a ni bawk a, traffic jam nasa lutuk ṭhin tihziaawm nan helai kawng hi one-way-a siam tum a nih thu Lyngdoh chuan a tarlang.