AP : Police-in Khoya Paya Abhiyan kaltlangin phone ruk tawhte pe let

Arunachal Pradesh-a Itanagar police-te chuan Khoya Paya Abhiyan hmalakna kaltlangin phone bo leh ruk 75-te chu a neitute hnenah an pe let leh.

Khoya Paya Abhiyan hi thla nga liam ta chhung khan kalpui tawh niin, Arunachal Pradesh-a police station zawng zawnga kalpui tura ruahman a ni. Itanagar police-te hian Khoya Paya Abhiyan kaltlang hian phone bo leh ruk 150 an hmu let tawh a ni.

Tun ṭuma phone bo leh ruk 75 an hlanna hun hi 75@75 hming vuahin, an khawpuia police-te inpekna lantirna leh phone 75 an pek lette hian Republic Day vawi 75-na lawm tur a entir niin an sawi. He hunah hian Itanagar police-te hian cyber crime awareness handbook an tlangzarh nghal bawk a, handbook hi Itanagar police-te buatsaih niin, Itanagar Capital Region (ICR)-a chengte tana cyber crime chungchanga inzirtirna leh cyber crime chi hrang hrang bakah, inven dan turte leh inven theih dante ziah a ni. Cyber crime awareness handbook hi Director General of Police (DGP), Anand Mohan chuan a tlangzarh a ni.