Kuki zirlai pawlin PHE exam an boycott

Kuki Students Organization (KSO) General Headquarters chuan Manipur Public Health Engineering Department-in hna lakna atana exam a buatsaih tur chu an boycott tih an sawi.

KSO hian PHE department hnuaia hna lak turah hian Lamka (Churachandpur)-ah exam a nih ve theih nan centre dah ve an dil chu thuneitute'n an bawhzui ṭhat loh avangin exam hi an boycott thu an tarlang.

Kuki zirlai hruaitute chuan nikum November 27 aṭang khan department hnuaia thuneitute hnenah exam centre an siam dan chu ennawn leh turin an lo ngen tawh a, tun thleng hian chhanna an la dawn loh thu an sawi,"Hetianga innamnulna avang hian duhthlan tur dang kan nei lo a ni," tiin an sawi.

Thuneitute'n inthliarhranna an kalpui chu zirlai pawl chuan na takin an sawisel a, Kuki-Zo zirlai ṭhahnem takte beisei leh mamawh em em in ngaihsak a hlawh lo chu zirlaite zalenna rahbehna a nih bakah, thuneitute'n mi zawng zawng tana hamṭhatna thuhmun siamsak an tum lohzia a tilang a ni, an ti.

KSO chuan Kuki-Zo zirlai zinga exam hmachhawn tum zawng zawngte chu an thil phut tihhlawhtlin a nih hma chu PHE exam neih tur chu hmachhawn lo turin an hriatir. "Churachanpur-a exam centre kan dilna tihhlawhtlin a ni lo hi kan hnam zirlaite hmasawn theihna daltu a ni tih kan hria a, rolrelna dik a awm hma loh chuan exam boycott tura thutlukna hi kan zavaiin kan thlawp tlat a ni" an ti. Thuneitute chu an buaina hriatthiampui a, a rang thei anga bera an buaina chinfel a nih theih nan inbiakna neihpui an duh thu an sawi bawk.