Bharat Jodo Nyay Yatra: Assam special CID-te'n chhui chiang dawn

Assam sorkar hnuaia Criminal Investigation Department (CID) chuan Special Investigation Team (SIT) dinin, Khanapara-a Congress party hruaitu, Rahul Gandhi kaihhruaia Bharat Jodo Nyay Yatra neih zawh takah Congress hruaitute'n dan an bawhchhia em tih an chhui chiang dawn. SIT hi Addt. DGP, Assam CID in a kaihruai dawn a ni.

Assam Police-te chuan Yatra neih laia dan bawhchhiaa puh Rahul Gandhi leh Congress hruaitu dang laka thubuai an ziah luh chu SIT-te'n an chhuizui theih nan Nilaini khan CID kutah an hlan chhawng.

DGP chuan Congress-in Yatra neihna tura kawngpui zawh an tum dan chu sawiin, Meghalaya aṭangin Kamrup panin Guwahati paltlang an tumnaah kawngpui pawimawh tak pahnih a awm a, an inbiak hnuin kawngpui pakhat zawk hman phalna an pek thu a sawi. "Mipui nawlpui, kawngpui hmangtute'n harsatna an tawh loh theih dan tur berin ruahmanna kan siam a ni. Mahse Yatra chhimtu mipuite chuan an kawngpui zawh mek chu thlak tumin, hei hian khawpui nunphung a tihbuai theih bakah Z+ category hnuaia venhimna pek, Yatra neihnaa tel ve himna atan pawh a pawi thei a ni" a ti.

Chief minister Himanta Biswa Sarma-a'n Congress worker leh Rahul Gandhi lakah Assam Police te chu thubuai ziak lut tur hian a lo ti tawh a, Congress worker-te chu police nena an innawrbuai avang leh GS road a an lut tur danna atana Khanapara-a daidanna an dah an lak sawn avangin thubuai hi ziak lut turin a hriattir a ni.