Kangla Fort meeting neihnaah Meitei pawlin MLA-te kutthlak

Manipur MLA pathum chu Meitei kalfawr pawl, Arambai Tenggol chuan Nilaini khan Kangla Fort-a meeting an neihna hmunah kutthlakin an sawisa a, sawisak tuartu zinga pahnih hi rorel lai party, BJP MLA an ni.

Meeting neihna hmuna awm MLA pakhat chuan, MLA pathum te chu Arambai Tenggol-te thil phut an pawmpui theih loh avangin sawisak an tuar tih a sawi. "Tumah kha ṭawng ngam kan awm lo a, a chhan chu anmahni ep zawnga thusawi chuan kan in leh lo beiin an hal duh dawn tih kan hriat vang a ni" a ti. An thil phut pawmpui lotu MLA te nen an inhnial buai hnua kut thlaka an sawisak zui avangin, anni tan pawh Meitei pawl thil phut pawmpui lo thei an ni lo tiin a sawi.

Meeting-naa tel ve, MLA pakhat erawh chuan a tirah thu inhmuh lohna awm mah se, MLA te chuan anmahni duh thu ngeiin Aramnai Tenggol-te thil phut chu pawmin hming pawh an ziak niin a sawi ve thung.

Meitei pawl, Arambai Tenggol hian Manipur state-in dikna leh chanvo a neihte humhim tura thutiam la tura phutin meeting hi a ko a, he huna hian MLA 60 zinga 37 leh Lok Sabha leh Rajya Sabha MP pahnihte chuan thu hi an tiam a ni. Legislator-te hian Arambai Tenggol-te thil phut dang pawh pawmpuiin, chung zingah chuan Manipur state chhunga National Register of Citizens (NRC) chu 1951 mila siam rem leh , Kuki helpawl nena inremna (Suspension of Operation) an neih mek chu ni 15 ral hma ngeia tihtawpte a tel a ni.