Sikkim marathon-ah Milind Soman tel dawn

Indian model-actor leh fitness star Milind Soman chuan motor khalhtute puala Sikkim in marathon an buatsaih turah a tel dawn tih a tichiang.

Sikkim chief minister Prem Singh Tamang chuan nikum khan July 27 chu driver-te puala sorkar chawlh a nih tawh tur thu a sawi, motor khalhtute leh an chhungte tan bik Sikkim Sarathi Welfare Board din a nih thu a sawi bawk. Sikkim inthlanpui, kum 2019 a neihah khan driver-te chu kum 25 chhung roreltu Pawan Chamling paihthla tura CM P.S. Tamang thlawptu pawimawh tak an ni.

Marathon buatsaihtu zinga mi, Dipankar Lama chuan marathon an buatsaih chhan chu Sikkim-a motor khalhtute chawmawina leh an zahna lantirna a nih bakah Sikkim chu India rama tlan lam intihsiakna hmunpui atan siam a ni a, chumi a thlen theih nan chuan motor khalhtute chu khualzin hip kawnga an pawimawh thu a sawi.

Marathon hi Sikkim khawpui Gangtok-ah neih a ni dawn a, kilometre 10 a thui tlan tur a ni a, lawmman atan nuai 12.5 ruahman a ni. Khawvel huapa runner ṭha, Nepal mi, Mira Rai pawhin Sikkim marathon buatsaih turah hian tel ve ngei a tum thu leh a team-te pawh an phur tawh thu a tarlang.