Indo-Myanmar ramri hung hna BRO-in thawk dawn

Border Roads Organisation (BRO) chuan Indo-Myanmar ramri hung hna chu a tam zawk an thawk dawn a, Manipur state chhungah hma lak ṭan tawh niin Moreh lamah km 10 a thui hung zawh tawh a ni.

BRO Addt Director General (East) P.K.H. Singh chuan Ministry of Home Affairs chuan ramri, km 1,700 a thui chu hung turin a tichiang tawh a ni tiin, Manipur-a ramri a hung hmabak km 80 a thui chu DPR theh luh a ni tawh bawk tih a sawi.

Union home minister, Amit Shah chuan tunhnai khan sorkar laipuiin Indo-Myanmar ramri chu Bangladesh nena ramri angin thir hlingnei hmanga hung (barbed fencing) tur a nih thu a sawi a, hei bakah hian sorkar laipui chuan Myanmar nena zalen taka inkal pawhna (Free Movement Regime) chu a ngaihtuah ṭhat dawn thu a sawi bawk. Hei hi hmarchhaka state leh pawl ṭhenkhat chuan an duh lo thung.

Naga zirlaite'n ramri hung tumna pawmpui theilo

Naga Students' Federation (NSF) chuan sorkar laipuiin ramri hung a tum chu an dodal dawn tih sawiin, Naga hnam ṭhen hrang thei chetna reng reng chu an thlawp loh tur thu an sawi.

NSF hian zalen taka India leh Myanmar ramria inkalpawh theihna; FMR tihtawp tumna chu an dem thu an tarlang bawk."Zalen taka inkawlpawhna tihtawp tumna hian Naga mipuite a ṭhawng hle a, tunhma aṭangin tihluihnaa ṭhen hran hi Naga hnamte hian kan tuar a ni," an ti. Nagaland sorkarin tih tak zeta ramri hung an dodal chu an thlawp thu an sawi bakah, chak leh zualin FMR titawp lo tura sorkar laipui nawr turin an duh thu an sawi bawk.

Naga zirlai pawl hian sorkar laipui chu a thutlukna ngaihtuah ṭha leh tura an duh thu an sawi a, Naga mipuite chu thutlukna an siamnaah rawn ve tura an duh thu an tarlang. Hei hi an dikna chanvo a nih bakah India sorkarin a thutiam, hnam tenau zawkte humhim a tiamna kawnga hma an lakna pawimawh tak a nih tur thu an sawi.