Manipur : Moreh-ah class kal duhin zirlai pungkhawm

Manipur-a tualchhung buaina chhuak avanga harsatna leh buaina hrang hrang a la awm a, thla tir lama helpawlte beihna vanga thihna thleng a awm avanga sorkarin venhimna lam tihchhah a, khauh zawka dan leh hrai kengkawha, vantlang nunphung a pangngai theih loh laiin, Tengnoupal district, Moreh-a zirlaite chuan class pangngai kal chhunzawm leh an duh thu sawiin an pungkhawm.

Zirlai pungkhawmte hian tualchhung buaina thlengin an nun mai bakah, an zirlai thlenga a nghawng rei tawh avanga an mangan tawh thu an sawi. Kal khawmte hian thuziak te kengin, zirna chu an pianpui chanvo a nih thu leh, sikul hawn leh tawh chu an duh thu an tlangaupui a ni. Zirlai pungkhawmte hi Moreh-a sorkar sikul leh mimal sikul 36-a kalte an ni a, an hma hun chu sikul an kal theih loh avangin a chhe vek niin an sawi.

Moreh-ah hian nikum October thla khan helpawlin police officer pakhat an that a, he police officer thattute pahnih hi police-te chuan tun thla tir khan manin, mipui lam hian police-in an mante chu chhuah zalen an duh thu an sawi thung a, police-te hian beih an tawh phah hial a ni.

Manipur police-te'n mihring leh ralthuam man

Manipur police-te chuan Inrinni khan state pumah beihpui thlakin ralthuam thuhruk eng emaw zat leh mi paruk an man.

Police-te hian Imphal West-ah mi paruk manin, an zingah hian United National Liberation Front (UNLF) mi leh sa pakhat a tel thu an sawi.

Hetih lai hian Tengnoupal district-a Moreh-ah Assam Rifles sipaite chuan bag hmanga thuhruk, 12-bore rifle leh a magazine paruk bakah, rifle kawm an man bawk. Heng ralthuam thuhrukna bag hi Skill Development Centre building bula an man niin an sawi. He beihpui thlaknaa ralthuam leh mihring mante zawng zawng hi an manna aṭanga police station hnai berah pek vek an ni a, an chungthu la ngaihtuah tur an ni.