Tripura : Loneitute pui theitur mobile app siam a ni dawn

Tripura-a Bagma Agri Producers Company Limited (BAPCL) chuan loneitu te pui thei tur mobile application an siam dawn a, mobile app an siamtur hi NABARD chuan a pawmpui tawh bawk a ni.

BAPCL dintu Sudip Majumder chuan,"Ni 15 aṭanga 20 hnu velah tlangzarh hman kan inbeisei a, chumi tur chuan kan inbuatsaih ngawrh hle a ni" a ti. He application siam nan hian BAPCL chuan Rs nuai 10 a ruahman a, khaw kilkhawr ber thlenga ṭangkai taka an hman theihnan hmalak a nih tur thu a sawi bawk.

Mobile application thar an siam tur hi loneitute tana thil pawimawh hrang hrang rang taka an hriat theihna tura duan a ni a, heng zingah hian khawchin leh thlai hralhna hmun tur inkawhhmuhnate pawh a tel dawn a ni. Khawchin dik taka tarlang thei tur hian ICAR nen an thawhdun thu Majumder chuan sawiin, leiṭha hman tur chin leh rannung thahna hlo (pesticide) hman dan turte chu mithiamte nen ṭangkawpin chhawpchhuah tel a nih tur thu a sawi. Heng bakah hian hlawk lehzuala thlai thar dan tur leh, thaithlar lak hun dik takte chu tarlan a ni ṭhin dawn bawk niin a sawi.