Nagaland : RPP-te'n FMR chungchangah ṭawngṭai rual neih an rawt

Nagaland-a Rising People's Party (RPP) chuan Inrinni khan Free Movement Regime (FMR) titawp a, India leh Myanmar inkar ramri, km 1,600 zeta thui hung tum chungchangah, India sorkara roreltute chu finna pek an nih theih nan Naga leh Zo-Kuki-Chin chhungkua zawng zawngte leh kohhran zawng zawngte chu an ṭawngṭai rual a ṭul thu an sawi.

RPP hian thuchhuah siamin, Naga leh Zo mipuite ṭangruala an thawhchhuah hun a thlen tak thu sawiin, hnam zia leh nun hluite tihreh a nih lohna tura thiltih dodal tura an ṭanrual chu a ṭul thu an tarlang.

Sorkar laipuiin FMR titawp a, ramri hung a tum chuan Nagaland, Mizoram, Manipur leh Arunachal Pradesh-a tribal chengte a ṭhawn thu sawiin, heng laia chengte rilru a nat thu an tarlang a, sorkar laipui chuan a thil tum chu a kaltlangpui a nih chuan heng lai hmuna remna awm sa chu a chhiat vek tur thu an sawi bawk a ni.

"Sorkar laipui hian hmarchhakah hian remna leh muanna kumhlun zawk siam tur a hmalak aiin, anmahni runluihna hawi zawngin ruahmanna a la nei zel zawk a ni. Manipur-a buaina awm sa nena inhmu tur takin sorkar laipui hian FMR chungchanga a thutlukna hi a kengkawh a nih chuan buaina a la chhuak ngei ang. Chu chuan India hi a ṭhendarh dawn a ni. Burma-a kan unau tenen kan inzawmna hi ramri hung hmanga tihtawp theih a ni lo a, hei hi kan ram hruaitute pawhin an hriat a ṭul a ni," an ti.