Manipur : Kuki MLA 10-ten rorelna hran an duh thu sawi nawn

Manipur-a Kuki MLA 10-te chuan India danpui hnuaiah Manipur aṭanga rorelna hran siamsak an phut thu an sawinawn leh a, MLA 10 zinga pasarih rorel lai BJP MLA an ni nghe nghe.

BJP MLA Paolienlal Haokip chuan "India danpui hnuaiah rorelna hran min pek ngei hi kan phut a ni" a ti. P. Haokip hian Prime Minister chu Manipur dinhmun sawipui tura hmuh an tum thu sawiin Prime Minister Office (PMO) chuan an dilna chu a hnawlsak a, mahse Thawhlehni khan email thawnin Manipur dinhmun chuan ziaawm lam aiin zual lam a pan thu kan sawi leh a ni, a ti.

Kuki MLA-te hian memorandum buatsaihin Kuki helpawl leh Manipur sorkar inremna Suspension of Operation (SoO) an lo siam tawhah, lehlam pawmpuina tel loa Legislative Assembly ṭhukhawmin inhnuhdawh an tihtluk chungchangah Prime Minister inrawlh tura an duh thu an sawi. Hei bakah hian Moreh aṭanga Manipur Police Commando-te hnuhkir leh, AFSPA dan hnuaia Manipur dah leh chu an phut bawk a ni.

MLA-te chuan an memorandumah hian,"Kangla Fort-a thil thleng kha Manipur buaina hian ziaawm lam aiin zual lam a pan tih tichiangtu a ni. Meitei kalfawr pawl Arambai Tenggol chuan MLA leh minister 37 leh MP pahnihte chu tihluihnain thutiam an laktir a, India danpui hnuaia thutiam an lak chu an bawhchhia a ni," tiin an tarlang. Arambai Tenggol chuan khami ni khan Meitei MLA pathum chu mipui hmaah an tihmualpho thu leh security force tam tak awm mah se kutthlak an nih thu an sawi bawk. Manipur CM-in thil thleng chungchangah ngawih a chuh tlat chuan an state chhunga hnam tenau zawkte dinhmun him loh zia a tilang niin an memorandum chuan an tarlang bawk.

"May 3, 2023 aṭang khan Arambai Tenggol chuan Kuki-Zo mipuite lakah beihpui an thlak tawh a, tunhnaia an chetdan avangin Manipur-a inṭhenhranna thleng hian zual lam an pan a ni. Sipaite chuan AFSPA hnuaia thuneihna pek an nih loh chuan ngawi renga thlir bak tih theih an neilo a ni," an ti.

State khawpui, Imphal-ah chuan dan pela chetna chu kalphung pangngai a nih tawh nia sawiin, Taliban ang maia che Arambai Tenggol chetdan chuan Manipur Valley-ah India danpui hnuaia rorelnain hmun a chanloh zia a tilang niin Kuki MLA-te chuan an sawi. Manipur sorkar chu engmah ti ngam loa siam a ni a, hetianga kalfawr pawl ten mipui thlan lal te aia thu an neih hi India rama thil thleng atan chuan mak an tih thu an tarlang a, buaina chinfel vat anih theih nan hmalak thuai a ngaih thu an sawi a ni.

Kuki MLA-te chuan memorandum hi union home ministerAmit Shah hnenah an thehluh thu leh, chhan let an la nih loh thu an tarlang tel bawk.