Tripura : MGNREGA thawktuten hlawh lak theih loh vangin nawrh huaihawt

Tripura-a North Gandachara-a MGNREGA hnuaia inhlawh ṭhin ten hlawh an lak theih loh avangin nimin khan nawrh an huaihawt a, Ambassa-Gandachara kawngpui dangin lirthei chetvelnaah harsatna a thlen.

Ambassa-Gandachara hi Dhalai district-a awm niin kawngpui dan a nih vang hian mipuite pawhin harsatna an tawh thu an sawi.Lungawi lo pungkhawm zinga pakhat chuan, North Gandachara-a MGNREGA hnuaia an inhlawhna chu thla tam tak an dawn tawh loh thu sawiin, Panchayat-te hnena an thlen hnu pawhin hmalakna mumal a awmlo a, hei vang hian hetianga an chet mai hi a ngaih phah ta niin a sawi.

Kawngpui danna hmun hi thuneitute chuan pan nghalin, nawrh huaihawtte hi inbiakna an neihpui a, an harsatna chinfel sak thuai an intiam avangin pungkhawmte chuan an kawngpui dan chu an titawp zui ve bawk. Mahse thuneituten an intiam anga hma an la thuai a nih loh chuan a aia nasa zawka nawrh huaihawt leh a ni dawn tih an sawi nghal a ni.