Meghalaya : Hmun 3-ah CUET exam theih dawn

Meghalaya education minister, Rakkam A Sangma chuan an state-ah Common University Entrance Test (CUET) examination neihna tur centre pathum a awm dawn tih a sawi.

Minister chuan National Testing Agency (NTA) Director General nen an inbiaknaah, Meghalaya-a CUET exam centre pathum siam an remtih thu a sawi. Centre hi Tura-ah pakhat awmin a dang pahnih chu Shillong-ah a awm dawn a ni.

RA Sangma hian NTA hnenah hian undergraduate exam neihna tur centre panga aia tam siam rawtna an thlen a, mahse NTA lam hian exam tur tam dan a zirin an exam centre an ruahman thu an hrilh tih a sawi. State pawn lamah CUET exam tura zirlaite an kal chhuah kher a ngaih lohna turin theihtawp kan chhuah a ni, a ti. Sangma chuan zirlai exam hmachhawn tumte chu ngawrh taka inbuatsaih tura chah in, NEHU hnuaia seat ruak tam tak awm chu an state chhunga zirlaiten an chan ngei theihnan ṭang turin a fuih bawk.

Sorkar laipui chuan 2023 khan Meghalaya chu Central University-a lut tura CUET exam hmachhawn ngai chu chhan hrang hrang vangin 2024 thleng ngaihhnathiamna a lo pe tawh a ni.