Asom Gana Parishad-in mi thar 200 chuang lawm lut

Assam-a party ṭhang­duang ber pawl, Asom Gana Parishad (AGP) chuan Thawhṭanni khan political party hrang hranga office bearers 200 chuang an lawm lut.

Lawmluhna hun hi AGP headquarters, Guwahati-ah neih niin party-a hruaitu pawimawhte an tel kim hle. Lawmluh zingah hian hming lang sar tak tak - Assam Congress general secretary Apurba Kumar Bhattacharjee, Asom Jatiya Parisha central secretary Paban Saikia leh AJP Golghat District Committee president Ajit Gogoi-te an tel.

AGP President Atul Bora leh AGP hruaitute chuan an party-a lawmluhte chu duhsakna an hlan a, Assam-a sorkarna siam an tum chuan party chhungah lo awm mek leh rawn lut tharten thawhhona ṭha tak an neih a pawimawh thu an sawi.

Assam BJP pawhin Pathianni khan mithar lawmluh na hun an lo nei tawh bawk a, lawmluh zingah hian politics-a mi challang tak tak an awm a ni. Assam Youth Congress president Angkita Dutta, Congress MLA hlui Bismita Gogoi, All Assam Students Union (AASU) president hlui Dipanka Kumar Nath leh AASU vice-president hlui Prakash Das-te chu lawmluh zingah hian an tel a ni.