Manipur : COCOMI-in loneitute zángnadawnna pe turin phût

Coordinating Committee on Manipur Integrity (COCOMI) Farmer Wing chuan Thawhlehni khan thuchhuah siamin, Manipur sorkar chu loneitute hnena zàngnadawmna sem tur sorkar laipuiin a pek tawh, February 10 hma ngeia a dawng turte hnena pe chhuak turin an phut.

Zángnadawmna hi Manipur tualchhung buaina chhuak avanga thlai tihchhiatsak tuarte hnena pek chhuah tur a ni. Sorkar laipui hian loneitute pek tur atan hian nikum October thla khan Rs. vbc. 38.60 a lo pawm tawh a ni.

COCOMI chuan Imphal-a press conference an neihah sorkar laipuiin sum hi a pe chhuak tawh mahse, state sorkar chuan tun thlengin loneitute kutah a hlan chhawng lo tih an sawi.

Farmer Wing coordinator, Laishram Kiran chuan February 10 hmaa loneitute'n zángnadawmna hi an dawng lo a nih chuan nawrh huaihawt thlenga hma an lak tur thu a sawi. Kiran chuan nikum May 3-a tualchhung buaina a chhuah hnu khan mipui nawlpuiin sawi chhuah sen loh khawp harsatna an tawk a, chung zingah chuan loneitu leh nitin eichawp zawngte tawrhna chu a nasa zual bik tih a sawi. Hetih laia zàngnadawmna an dawn tur ngei pek chhuah an ni mai lo chuan an harsatna a belhchhah a, sum hi pek thuai an nih loh chuan an huan thlai chin tur thlengin harsatna an tawh belh leh thei dawn a ni, a ti.

Kiran chuan Manipur chief minister leh agriculture miniser te'n loneitute hnenah sum hi pek chhuah thuai a ni dawn tih an sawi reng chunga tun thleng pek an la nih loh chhan a zawt nghal bawk.

COCOMI coordinator dang, Somerendo Thokchom chuan Farmer Wing thil phut chu COCOMI hnuaia peng hrang hrangte'n an thlawp thu sawiin, an hmalakna zelah pawh an dinpui zel dawn tih a sawi.

Nikum May thla aṭanga Manipur-a tualchhung buaina chhuak hian mipui nawlpuite nunphung a tikhaihlak nasa hle a, mi 200 chuang thi tawhin mi 60,000 chuangte'n an chenna an rauhsan tawh bawk. Loneitute pawhin buaina avang hian harsatna tawkin mi sang chuangin an rama thlaithar hmun tur pawh siam ngam loin an awm mek a ni.

Manipur agriculture department-in zir chianna a neihah, buaina chhuah hnuah hian ram awl, huan atana loneitute'n an siam ngam loh chu district pariatah ram hectare 5,127.08 a zau a nih thu an sawi a, heng zinga a tam zawk hi chu Meitei leh Kuki-Zomi te inrina hnaiha mi an ni tih an tarlang bawk.