Tripura sorkarin bawnghnute aṭanga siamchhuahah subsidy pe dawn

Tripura-a Food and Civil Supplies department chuan an state chhunga bawnghnute aṭanga siamchhuah product paliah subsidy pek a tum thu an sawi, hengte hi sorkar ration dawr/Fair Price Shop (FPS) aṭanga lei chhuah theih tura ruahman a ni.

Supply minister Sushanta Chowdhury chuan enchhinna anga kalpui phawt a nih tur thu sawiin, Ice-cream, paneer, curd leh ghee-te an zawrh chhuah tur thu a sawi.

Bawnghnute aṭanga siamchhuah, ration dawra man tlawm zawka zawrh chhuah a nih theihna atan hian state supply department leh Gomati Dairy chuan inremna an ziak a ni. Cooperative society, Gomati Diary te'n an thil siamchhuahte hi February 16 aṭangin state khawpui, Agartala leh a chhehvela ration dawr 15-ah an chhawpchhuak ṭan dawn a ni. A hlawhtlin chhoh dan a zirin ration dawr tam zawkah pawh zawrh chhoh tum a ni ang.

Ration dawrah hian mamawh dan ang mila thil siamchhuahte hi dah a ni dawn a, thil zawrh vawn ṭhat nana bungraw mamawh tur fridge leh thil dangte chu Gomati Dairy lam hian an tum dawn a ni.

Supply department chuan ration card pakhatin buhfai kg 5, kg khat Rs. 13 zela an dawn belh theih dawn thu an sawi bawk. Supply minister chuan ,"National Food Security Act hnuaia hamṭhatna an dawn sa chu a ngai ang rengin a la kal anga, Above Poverty line-a awmte pawn thla hnih chhung a ngai angin hamṭhatna an dawng ang. Tuna buhfai kg 5 dawn belh theihna hi chu ration latute hamṭhatna belhchhahna a ni a, hemi atan hian buhfai hi metric ton 10,000 ruahman niin February leh March thla chhung a huam ang," a ti.

Food and Civil Supplies department hian an department hnuaia thil tifaitu hmeichhiate hlawh pawh a tipung bawk a, nikhat hlawh Rs. 150 ni ṭhin kha Rs. 306-a tihsan niin state sorkarin hemi atan hian Rs. nuai 23.90 a seng dawn a ni. Heng bakah hian mi tam zawkin hamṭhatna an dawn theih nan state chhungah ration dawr 51 hawn belh tum a nih thu an sawi bawk.