Meghalaya : February 16 aṭangin budget session nei dawn

Meghalaya Legislative Assembly chuan February 16 aṭangin budget session an nei ṭan dawn.

Budget session hi kum dangah chuan March thlaa neih ṭhin a ni a, kuminah erawh chuan Lok Sabha inthlan kum a nih avangin sawn hma a ni. Session hian March 1 thleng a awh ang.

Meghalaya Governor Phagu Chauhan chuan Thawhṭanni khan session a koh thu hi hriattirna a tichhuak a, February 16, chawhma dar 10 aṭangin ṭan tur a ni, a ti. Session hi assembly chamber, Rilbong-ah neih a ni ang. Governor chuan,"India danpui hnuaia Article 174 (1)-in thuneihna min pek angin, kei Phagu Chauhan, Governor of Meghalaya chuan Meghalaya Legislative Assembly chu February 16, Zirtawpni chawhma dar 10 aṭanga neih ṭan turin ka ko a ni" a ti. Bussiness Advisory Committee chu budget session-a an sawiho tur buatsaihin Zirtawpniah an ṭhu khawm dawn a ni.