Assam : Lawi leh Sava insualtir phal vangin PETA-in petition theh lut

Assam sorkarin Bhogali Bihu festival-ah lawi (Buffalo) leh sava chikhat (Bulbul) te insualtir tura phalna a pek avangin People for the Ethical Treatment of Animals (PETA) chuan Gauhati High Court-ah petition a theh lut.

PETA chuan sorkarin hetiang phalna a pek hi ramsa chunga nunrawnna lantirna a ni a, court chu inrawlha tihtawpna thu pe turin an duh a ni. Hiraj Laljani, PETA publicist chuan,"Petition hi Justice Manish Choudhury, Gauhati High Court ngaihtuah tura tihfel a ni tawh a, PETA tana ding tur advocate Diganta Das chuan Court-a thubuai ngaihtuah chhunga phalna pek titawp lailawk turin ngenna kimchang a theh lut dawn a ni" a ti.

Petition theh luhah hian PETA chuan January 15-a Hajo, Assam-a bulbul insualtir zir chianna chuan sava insualtir turte chu dan pela man an nih bakah an duhthlanna ni loa chaw inchuha insual luihtir an nih thu an tarlang. Bulbul hi Wildlife Protection Act, 1972-in a humhalh zinga mi niin Schedule II hnuaia dah an nih avangin man chu danin a phal lo a ni.

Lawi leh Bulbul insualtir phal hi India danpui bawhchhiatna a nih bakah Prevention of Cruelty to Animals Act 1960 leh Supreme Court-in Animal Welfare Board of India leh A. Nagaraja inkhinnaa thutlukna a siam tawh a bawhchhia a ni, tiin petition-ah hian tarlan a ni bawk. Lawi insiktir hian an kiin an taksa peng hrang hrang - nghawng, beng, hmai leh chalahte hliam an neih phah ṭhin thu a tarlang a, pakhat zawk zawk an tlawm hma chu insualtir an nih ṭhin thu an sawi bawk.

PETA hruaitu zinga pakhat Tushar Kol chuan Lawi leh Bulbul te hi ramsa nunnem tak niin tihluihnaa mipui tihhlim nan insualtir an nih ṭhin avang hian hliam leh natna te an tawk ṭhin tiin a sawi a, PETA India chuan Gauhati High Court hian hetiang nunrawnna leh India danpui bawhchhiatna hi a tihtawp ngei kan beisei a ni, a ti.