Nagaland-in 4th Asia Music Summit thleng

Nagaland chuan February 1-3 chhunga neih tur, 4th Asia Music Summit (AMS) 2024 a thleng.

AMS hi nizan khan Capital Cultural Hall, Kohima-ah opening ceremony neih niin, Nagaland chief minister Neiphiu Rio chuan a hawng a ni. He event hi MusiConnect Asia hmalakna niin, Nagaland sorkar hnuaia Task Force for Music & Arts (TaFMA) chuan a lo thleng a ni. Rimawi inkhawmpui hian ni thum chhung a awh dawn a, ram 15 aṭanga palai lo kalte'n an thiamthil te hrilhriatna hun an hmang dawn a ni.

Theja Meru, Task Force for Music and Arts (TaFMA) Chairman chuan Nagaland Chief Minister-in hetiang hun thleng thei tura a thlawpna leh, rimawi tihchangtlun kawnga a hmalaknate chu fakawm a tih thu a sawi a, he summit an thlen hian Nagaland chu rimawi thiamna leh hmasawnna a thlen ngei a beisei thu a sawi bawk.

Asia Music Summit hi MusiConnect Asia flagship project niin, hemi hmang hian Asia music-te chawilar tum a ni. Kum 2020 aṭang khan neih ṭan a ni a, Global Toronto nena thawk dunin vawi hnih buatsaih a ni a, nikum khan edition pathumna chu Ulsan, South Korea-ah neih a ni.