Manipur : Meitei sipaite hnena chakkhai pe lo turin ngen

Manipur-a Tengnoupal district-a Village Volunteer (VV) chuan Moreh-a dawrkaite hnenah Meitei sipaite hnena chakkhai an pek ṭhin, tui leh thildangte chu pe tawh lo an ngen.

Village Volunteers Information and Publicity Department thuchhuah chuan an ngenna ngaipawimawh lo dawrkai an awm a nih chuan a ṭul anga hma an lak tur thu an sawi. "Moreh hian tun hnaiah harsatna a tawk nasa hle a, mipui zawng zawng him nan leh ralmuang taka an awm theih nan hetianga hmalak hi a ngai a ni. February, 2024 aṭang chuan Moreh-a tlai lama dawr hawng ṭhin zawng zawngte chu state sipaite an hnuhkir hma chuan an dawr khar rih turin kan ngen a ni" an ti.

Tengnoupal-a Village Volunteer-te hian an district chhunga state sipai awmte hnuk kir tur hian an phut a ni.

Manipur sorkar chuan nikum May 3-a tualchhung buaina a chhuah khan, Meitei chenna in eng emaw zat hal a nih avangin Moreh-ah hian state sipaite a tirhluh belh an ni. Buaina chhuah hnu khan Meitei 3,000 vel chuan chuan an chenna in an chhuahsan a, relief camp lamah himna zawngin an tlanchhia a ni.

Inkahna chhuakah mi pahnih in nunna an chan

Kangpokpi leh Imphal West inrina, Kadangband leh Koutruk hill huamchhungah Thawhlehni tlai lam dar hnih aṭang khan inkahna a chhuak leh a, mi pahnihin nunna an chan bakah midang pathumin hliam an tuar bawk niin police-te chuan an sawi.

Inkahnaa thite hi hriatchian ni tawh in, Meishnam Khaba Meitei (Kum-29) leh Nongthombam Michel Singh (Kum-32) te an ni a, ruang pahnih hi RIMS lama thawn nghal a ni. Hliam pathumte pawh RIMS lamah enkawl tura thawn niin an dinhmun a ṭhat thu an tarlang.