Hmarchhaka Railway tihhmasawnna atan Rs. vbc. 10,369 dah

Railway minister Ashwini Vaishnaw chuan Ningani khan thuthar thehdarhtute kawmin,sorkar laipuiin 2024-2025 Budget lailawk (Interim Budget) a pharhah, hmarchhak biala Railway tihhmasawnna turin Rs. vbc. 10,369 dah a nih thu a sawi. Hei hi 2009-2014-a an sum dah aiin 388% zetin a tam.

Vaishnaw chuan union finance minister Nirmala Sitharaman-i'n interim budget a pharhah, Indian Railways tan Rs. vbc. nuai 2.5 dah a nih thu sawiin,railway corridor programme pathum chu tihhlawhtlin a nih tur thu pawh a sawi lang a ni, a ti. Heng corridor-te hian bungraw che vel chu a tihchak bakah bugraw phurh man a tlakhniamtir dawn thu a sawi. Ashwini Vaishnaw hian Northeast huam chhunga station 60 chu chei ṭhat a ni dawn tih a sawi bawk.

Railway minister hian hmarchhak biala project thawh mekte chu a lungawithlak hle tih a sawi a, project-te a hun taka zawh a nih theihna atana rim taka thawktu team hrang hrangte a fak. Hmun chhengchhe tak takte a awm chungin, project-te chu ṭha taka thawh zel niin, hmasawnna pawh hmuh zel a ni tih a sawi.