Assam : Cabinet ṭhukhawmin autonomous council din a remti

Assam cabinet chu Nilaini khan ṭhukhawmin, village council aiah autonomous council-a awmna tura dan siam ṭhat ngai awmte chu siam ṭhat an remti. Cabinet ṭhutkhawm hi chief minister Himanta Biswa Sarma chuan a kaihruai a ni.

Cabinet ṭhukhawm hian state chhunga chi/hnam hrang hrang tan village council ni loin autonomous council nei turin a pawmpui a, chungte chu Rabha Hasong Autonomous Council, Sonowal Kachari Autonomous Council, Deori Autonomous Council, Thengal Kachari Autonomous Council leh Tiwa Autonomous Council te an ni. Hemi bakah hian Mising Autonomous Council chu village council neih tawh lo a, General Council a neih mek chu tihchak a phalsak bawk, mahse, tribal-te tana an seat dah hran chu a ngai angin a kal dawn thung a ni.

Assam Tourism (Development and Registration) Bill, 2024 chu cabinet ṭhukhawm hian a pawmpui bawk. He Bill hi Assam state chhunga khualzin hip kawngah hmasawnna a awm theihna tura siam a ni. Bill hian tourism lama sumdawngte chu mumal taka thuneitute hnuaia inziah luh tir bakah, adventure safety audit committee din leh dan zawm ṭha lo hremna tur a keng tel dawn a ni. Cabinet hian khawpui chhunga water supply scheme hrang hrang enkawl hna, municipalities area huam chhunga mi chu PHE hnen aṭangin Urban Local Bodies (ULBs) kuta hlan an remti bawk. Hei bakah hian Guwahati khawpuia flyover thar siamna tur an pawm nghal bawk a ni. Flyover hi Cycle Factory junction-ah siam a ni dawn a, a senso atan hian Rs. vbc. 376.11 ruahman a ni.