Manipur tribal-ten rorelna hran an duh thu sawn nawn

Manipur a Kuki-Zo commutiy chuan Inrinni liamta khan thuchhuah siamin, Manipur aṭanga rorelna hran siamsak anla phut reng thu an sawi nawn leh. India danpui Article 3 hnuaiah Union Territory neih an duh thu sawiin, Legislative Assembly keng tel ngei se an duh thu an sawi bawk.

Committee on Tribal Unity (COTU) chuan tualchhung buaina avanga nunna chan te hriatrengna vawi 9-na pualin public meeting hi Kangpokpi district headquarters-ah an nei a, an thil phut hi an sawi nawn leh a ni. COTU chuan khawchhe karah pawh mipui pungkhawm an ṭhat thu leh buaina karah hmalam hun ṭha beiseiin mipui techu an kal khawm niin an sawi. Minister Nemcha Kipgen leh MLA Haokholet Kipgen-te pawh public meeting neihnaah hian an tel a ni.

COTU thupuangtu Kaiminlen Sitlhou chuan public meeting-a tel zawng zawng chuan lungrual takin rorelna hran an phut a ni, a ti. Hei bakah hian Kuki-Zo te huamchin rama Meitei-ten buaina an siam a nih chuan na taka chhanlet an tum thu a sawi.

Kuki-Zo hnahthlak chuan Manipur chief miniser Biren Singh, MP Leishemba Sanajaoba leh COCOMI-te chu Kuki-te laka beihpui thlaknaa bultumtu an nih thu an sawi a, hei bakah hian sorkar laipuiin ramri hung a tumna leh zalen taka inkalpawh theihna (FMR) tihtawp a tum chu an duhloh thu an sawi bawk. Sorkar laipui nena inbiakna nei mek, United People's Front (UPF) leh Kuki National Organisation (KNO) a tawp thlenga thlawp an tum thu an sawi bakah, COTU hruaitute chuan an thil phut tihhlawhtlin a nih theih nan dan pela che mai loin India danpuiin a phal chin a hmalak zel an tum thu an tarlang.

Minister Nemcha Kipgen chuan Kuki-Zo mipuite chu an thil phut chungchangah an lungrual thu leh Kuki-Zo hruaitu zawng zawngte chuan an thlawp thu a sawi. MLA Haokholet Kipgen chuan rorelna hran chu hun rei tak aṭanga an lo phut tawh thil a nih thu sawiin Treaty of Yandabo, 1828 chu ṭanchhanah a hmang a ni. MLA chuan India ram tana Kuki-Zo mipui inpekna chu Meitei-te chuan nawrhreh an tum thu sawiin, state archives-a lehkhabute chu Meitei ten an hal thu a sawi. Lunthang Haokip, Sadar Hills Chief's Association exexutive member chuan CM N Biren Singh chuan Arambai Tenggaol te hmaah thutiam a lak tawh avangin chief minister ni zui zel tlaka a ngaihloh thu a sawi bawk.