Meghalaya-in zirtirtu aikal la tihtawp nan hma la dawn

Meghalaya sorkar chuan zirtirtu aikal lak tihtawp a tumna kawng khat atan school zawng zawngah TIMS mobile attendance app dah vek turin a hriattir. Hei bakah hian school principal zawng zawng chu notice board-ah zirtirtute thlalak langsar taka tar turin a ti bawk.

State Education Mission thuneitute chuan an state chhungah sorkarin zirtirtu tura a lak, midang lo chhawr chhawng leh ṭhin an awm thu an sawi a, hei hi dan bawhchhiatna a nih bakah service rules bawhchhiatna a nih thu an sawi. Hetiang chindan ṭha lo tak hi zirlai hmasawnna kawng daltu a nih theih thu sawiin Board exam-a an result ṭha lo tak ṭhin chu a tichiangtu a ni, an ti.

School Education and Literacy Director, Swapnil Tembe chuan zirtirtu aikal la ṭhin te chungah disciplinary action lak an tum thu a sawi. TIMS mobile app hian facial recognition bakah geo-fencing (zirtirtu chetvel dan, entirnan hung chin a hun hmain an pel em tih en theihna) a keng tel a ni. Zirtirtute hming, thlalak leh subject an zirtir chu school notice board-ah February 15 hmain tar vek turin a ni. Tempe chuan school education officer-te chu an huamchhung school hrang hrang chu surprise check nei ṭhin tura a hriattir thu sawiin, thupek bawhchhia school an awm chuan a enkawltu officer mawhphurhna a nih tur thu a sawi bawk.