Manipur hri kai zinga 58.59% Tualchhung aṭanga kai
Manipur state health department-in an state-a Covid-19 status report a tihchhuaha, an state-a hri kai hmuh chhuah tawh mi zinga 58.59% chu tualchhung aṭang kai an ni.
Report tihchhuah thar berah an state-a hri kai hmuh tawh hi 5,960 an tling tawh a, an zinga 1,541 chu central security force mi leh sa an ni. Covid-19 thihpui hi mi 27 an awm tawh bawk.
Health department hian a hmain hri kai hmuh chhuah zinga eng emaw zat chu khawi aṭanga an kai nge tih chhui ngaihna awm lo nia sawiin, hri leng mek chu tualchhungah a darh tawh nia a lan thu pawh a lo tarlang tawh. Mahse state sorkar erawh chuan tun thlengin an state-ah community spread a thleng tawh tih erawh a la puang lo thung.
Hri kai hmuh chhuah zinga 80% vel chu symptom nei lo nia sawi an ni. Health official chuan specialist doctor an neih daih loh avangin hri kai zinga dinhmun ngaihtuahawm deuhte chu Imphal-a hospital pahnih, RIMS (Regional Institute of Medical Sciences), leh JNIMS Jawaharlal Nehru Institute of Medical Sciences)-ah chauh enkawl theih an nih thu a sawi.