Assam : Prime Minister-in project Rs. vbc 11,000 man tur a hawng

Prime minister Narendra Modi chuan Pathianni khan Assam tlawhin, Guwahati-ah hmasawnna hna thawhna tur, Rs. vbc. 11,000 hu development project hrang hrang a hawng.

Project zingah hian Assam leh hmarchhak state dangte bakah Southeast Asia nena an inkalpawhna atana hmasawnna ruhrel dinna tur bakah khualzin hip leh infiammi theihna nei ṭhate'n ṭangkai taka an hman theih tur hmunhma ṭha siamna turte a ni.

Prime Minister chuan Assam-in a lo dawnsawn danah lawmthu sawiin an project hmachhawp chu Assam tan a ṭangkai ngei a beisei thu a sawi a, an thil tum hlawhtling taka an zawh hunah chuan Assam chu hmarchhak state zinga khualzinte luhka ber a nih tur thu a sawi. PM Modi-a project hawn zingah hian Maa Kamakhya Divya Pariyojana, kawngpui siamṭhat, infiamna ruhrel tihhmasawn leh damdawi in leh hriselna lama hmasawn a nih theih nana hmalakte a tel a ni.

PM Modi chuan he hunah hian hmarchhak state leh Assam-te chu India rampumin hmasawn a tumna kawngah an pawimawh hle thu a sawi. Project hawnnaah hian Assam Governor Gulab Chand Katarai, CM Himanta Biswa Sarma leh Union Minister for Ports, Shipping and Waterways Sarbananda Sonowal te'n an telpui a ni. Hawnna inkhawm hi Khanapara-a Veterinary College Playground-ah neih niin, Prime Minister hian public meeting a nei zui bawk.