Nagaland : Dikhu Hydro Electric Project dodal

Nagaland-a Dikhu Hydro Electric Project (DHEP), power mega watt 186 pe chhuak thei tur siam chu a nghawng tur khaw ṭhenkhatte chuan an dodal.

Sorkar thuneitu lam leh scientist-te chuan he project hian nghawng na tak a nei dawn lo tiin sawi mah se, a chhehvela khaw tam tak chuan an pawm thei lo.

DHEP hi Nagaland-a eng indaih lohna phuhruk nan a pawimawh hle a, sorkar laipuiin kum 2030 hmaa zawh hman tura a ruahman,eng mega watt 5,144 pe chhuak thei tur hydro project 17 siam tura a tih zingah a tel a ni.

Dikhu Hydro Electric Project hian a chhehvel khaw ṭhenkhata ram eng emaw zat chim dawna an hriat avangin khaw mite chuan an dodal a, Power department lam nen an inbe mek a ni. Central Electricity Authority chuan DHEP tan hian March 2025 thleng pawmpuina a lo pawhseisak tawh a, chumi hmaa project-in hma lam a pan thei lo a nih chuan an pawhseisak a rinawm tawh lo a ni. Thuneitu lam chuan DHEP chuan ṭangkaina leh hamṭhatna tam tak a ken tel thu an sawi a, a nghawng tur khua zawng zawng tan an project sum hmuh aṭanga 1% chu kum tin an dah hran tur thu an sawi bawk.