Sikkim : Sorkar hna kum 4 thawk tawh dah nghet dawn

Sikkim chief minister Prem Singh Golay chuan sorkar hnuaia ad-hoc, muster roll leh work charge basis-a a nghet loa thawk, December 31, 2023 a kum li thawk tlingte chu dah ngheh an ni dawn tih a sawi.

He thu hi February 4-a rorel lai party, Sikkim Krantikari Morcha (SKM) party-in an din champha vawi 12-na an lawmnaah a puang a ni. Chief Minister Golay chuan sorkar hnuaia group C leh group D thawktu, kum li chuang thawk tawhte chu February 9-ah Rangpo ground, Pakyong district-ah dah ngheh an nihna order lam turin a sawm nghal a ni.

SKM hian a nghet loa sorkarin a chhawr, dah ngheh an nih hun tur hi kum nga aṭangin kum riata tihpunna chu an sut a ni. Sikkim CM Golay chuan sorkar hnathawk, kum li lo thawk tawhte chu khawi department-a mi pawh ni se an zavaiin dah ngheh vek an ni ang, a ti. Hemi hma hian an sorkara kum riat thawk tawh chin, mi 1,078 chu dah ngheh an nih tawh thu a sawi bawk.

CM chuan an state-in old pension scheme a hman leh tawh dawn thu a sawi a, cabinet ṭhukhawm pawhin a pawm tawh niin a tarlang. Mahse sorkar hnathawkte chuan old pension scheme emaw new pension scheme emaw hman chu anmahni duhthlanna tur a ni, a ti. Chief Minister chuan Sikkim-a cheng chhungkua zawng zawngte'n sorkar aṭanga hamṭhatna an dawn ve theih nan Mukhyamantri Sanjivani Yojana chu cabinet ṭhukhawm chuan a pawmpui thu a sawi bawk a ni.

Social media platform-a content siam ṭhin, ṭhalaite pualin Creatorpreneurship scheme siam a nih thu leh, he scheme hmang hian video, reels leh blog siamte puihna, Rs nuai 1 - Rs. nuai 10 thleng pek theih an nih tur thu CM chuan a puang bawk.