Tripura-in Cancer Hospital sakna tur hmun pe

Tripura chief minister Manik Saha chuan an state-ah cancer veite enkawlna tur damdawi in din a nih theih nan, state sorkar chuan cancer hospital dinna tur atan ram acres 15-a zau North district lamah a pek thu a sawi.

Chief Minister hian A B Regional Cancer Hospital, Agartala-a World Cancer Day an hmannaa thu a sawinaah damdawi in thar din a nih tur thu hi a sawi a ni. Manik Saha chuan," World Cancer Day thupui, cancer enkawl kawnga ṭan lak hian a hun taka cancer enkawl a nih bakah awareness a pawimawh thu a tarlang a, dam chhuah theih loh ang hiala kan ngaih ṭhin pawh enkawl dam dan a awm a ni tih kan hre zel a ni. Chuvangin cancer ṭan tirh lama hmuhchhuah leh enkawlna mumal tak pek hian dam chhuah theihna a awm a ni" a ti.

CM Saha chuan oral cancer chu hmarchhak state-ah vei an tam thu sawiin, vaihlo leh zu ṭhat lohzia inzirtir kawnga ṭan lak a ngaih thu a sawi bakah hman khat-daih-sarang (single use plastic) hmang tam lo tura ṭan lak a ngaih thu a sawi bawk. Natna vei theihna chance a hniam nan inven a pawimawh thu a sawi bawk a ni.

Chief Minister chuan Atal Bihari Regional Cancer Hospital (ABRCH) Agartala chu cancer enkawl kawngah thawk ṭha a tih thu sawiin, a kaihhruai sorkar chuan cancer enkawlna tur hmun din belh chu a ngaipawimawh hle a ni, a ti.