Meghalaya : Hri len hnuah nu naupai 61 leh nau piang hlim 877 thi tawh

Meghalaya-a Director of Health Services Aman War chuan an state-ah Covid-19 hri len hnu, April thla aṭang khan nu, naupai 61 leh nau piang hlim 877 an thi tawh niin a sawi. Hei hi hri leng dona kawnga thawktu tam zawk hman an nih avanga damlo dangten enkawlnaa indaih lohna vang pakhat nia hriat a ni. 

War chuan nausen piang hlim tam zawk thihna hi damdawi lama enkawlna an dawn ṭhat loh vang te, pneumonia leh pian hlima boruak tlachham vangte an nih thu a sawi. Chanchinbu mite a kawmnaah War chuan state health machinery pum, Covid-19 dona kawng lama pawhpen a nih avanga nausen leh nu thihna thleng tam tak chu ngaihven ngai tak a ni, a ti. Nu naupai lai thi zinga tam zawk chu damdawi-in leh health centre-ah admit ni lo a, enkawlna an dawn ṭhat loh vang niin a sawi bawk. 

Damdawi-in leh health centre hrang hrangte hnenah, nu naupai laite chu Covid-19 containment zone aṭanga kal pawh ni se admit hreh lo turin a ngen nghal bawk. An state-ah Covid-19 vangin mi 10 an thi tawh a, hemi rual hian Covid-19 vang ni lo, natna dang vangin mi tam tak an thi tih hriat tel reng a ṭul a ni, a ti. 

Meghalaya-ah hian district 11-ah civil hospital pakhat ṭheuh a awm bawk, hei bakah hian community health centre 28 leh public health centre 139 a awm bawk. 

Pathianni khan state chhungah Covid-19 kai hmuh chhuah thar 60 awm lehin, hri kai enkawl dam 14 an awm bawk. Hri kai enkawl mek hi 1,284 an la awm a, enkawl dam 1,049 an awm tawh a ni.