Assam-ah 'Bagri Children Covid Care Centre' hawng

Assam health minister Himanta Biswa Sarma chuan Pathianni khan Guwahati-a Mahendra Mohan Choudhury Hospital(MMCH)-a 'Baigri Children Covid Care Centre' siam chu a hawng. 

'Baigri Children Covid Care Centre'-ah hian khum 55 a awm a, naupangte infiamna hmun turte siam telin, infiamna hmanrua hrang hrangte dah a ni bawk. Minis­ter chuan Covid-19 kai naupang zualte chu damdawi-ina ward pangngaia dahin hrehawmte an ti ṭhin tih sawiin, a enkawltute tan pawh harsatna a awm ṭhin a, naupang pual bika centre siam a ni chu lawmawm a tih thu a sawi. Khum awm zat pawh hi 80-ah tihpun an tum tih a sawi. 

Sarma chuan an state-ah hri kai an pung zel a, hri kai zingah ngaihtuahawm tak tak pawn a awm belh zel avangin health department lamin ICU leh oxygen-fitted bed an mamawh belh hle tih a sawi. July thla tawpah kha chuan MMCH ICU unit-ah Covid-19 kai dah ngai pahnih chauh an nih laiin, Pathianni khan ICU-a khum 24 chu luah khah vek a ni tawh a ni, a ti. Guwahai Medical College Hospital-ah pawh ICU khum a ruak hman lo tih a sawi bawk a ni. 

Pathianni khan Assam-ah Covid-19 vangin mi pasarih an thih belh leh a, he hri vanga thi zat hi 296 an tling tawh a ni. Hemi ni vek hian hri kai hmuh thar 1,980 a an awm a, hri kai hmuh chhuah tawh hi mi 1,05,774 an awm tawh. 

State pumah sample 21,87,187 endik a ni tawh a, positive 1,05,774 zinga 83,927 chu enkawl dam an ni tawh. Recovery rate hi 79.49% a ni. Hri kai mek 21,548 an la awm a, an zingah hian chief minister hlui Tarun Gogoi leh MLA-te an tel a ni.