Manipur tribal hotute'n Amit Shah hmu dawn

Manipur-a Kuki-Zo tribal organisation hruaitute chuan tunkar hian union home minister Amit Shah leh Ministry of Home Affairs-a hotu pawimawhte chu an state dinhmun chungchang sawipui turin an hmu thei dawn.

Sorkar laipui dawr tur hian tribal pawl hrang hrang - Indigenous Tribal Leaders' Forum (ITLF), Committee on Tribal Unity (COTU), Kuki Inpi Manipur, Zomi Council, Hill Tribal Council leh All Tribe Council aṭangin palai an kal a ni.

ITLF hruaitu leh thupuangtu, Ginza Vualzong chuan sorkar laipui dawr tura kalte hian Thawhṭanni zan khan Delhi an thlen thu a sawi. ILTF lam hian sorkar laipui hnenah Manipur chhunga dan leh thupek kenkawh a nih dan bakah, nikum May 3-a tualchhung buaina a chhuah hnua an mipuite tawrhna chungchangte thlen an tum thu an sawi.

Manipur chief minister, N Biren Singh pawhin Inrinni liam ta khan Home Minister Amit Shah hi Delhi-ah a hmu tawh bawk a, Manipur chungchanga hmalak dan tur pawimawh hrang hrangte an sawi dun a ni. Manipur CM chuan an state chungchangah sorkar laipui hian thutlukna pawimawh tak a siam thuai dawn thu a sawi. Manipur-a buaina a chhuah hnuah Amit Shah hian ni li chamin a lo tlawh tawh a, remna awm a duh thu sawi mah se, buaina hian zual lam a la pan zel zawk a ni.

Kristian pawlin thuchhuah siam

Manipur-a Kristian pawl, All Manipur Christian Organisation (AMCO) chuan Thawhṭanni khan thuchhuah siamin, tualchhung buaina chhuakah sakhaw hmun pawimawhte tihchhiat leh suasam tel a ni chu an dem thu an sawi.

AMCO president Rev. Simon Raomai chuan hetianga sakhaw hmun beih tel a ni hi rinna inbeihsakna a ni tiin, eng sakhua pawh ni se, an hmun pawimawhte chu inzah tawnsak a ṭul thu a tarlang. AMCO chuan Manipur-a hnam hrang hrang, a bikin Meitei leh Kuki-te chu hetiang thil thlen tawh lo tura ngenin, an inkarah inhriatthiamna leh inremna a awm theihna atana theihtawp chhuah turin a ngen bawk. Sorkar leh dan kengkawhtute pawh sakhaw hmunte khawih leh suasam a nih tawh lohna tura rang taka hma la turin an ngen a ni.