Arunachal Pradesh-ah district thar pahnih siam dawn

Arunachal Pradesh-a BJP kaihhruai sorkar chuan district thar pahnih siam belh rawtna a pawm. District thar tur hi Keyi Panyor leh Bichom niin AP-ah hian district 28 a awm tawh dawn a ni.

Arunachal chief minister Pema Khandu hoa cabinet ṭhukhawm chuan Arunachal Pradesh (Reorganisation of Districts) (Amendment) Bill, 2024 chu a pawm a ni. District thar siam belhna hi February 8 aṭanga assembly session neih turah sorkar chuan put luh a tum.

Sorkar thupuangtu Bamang Felix chuan Keyi Panyor district thar chu Lower Subansiri district aṭanga ṭhen hran tur a nih thu sawiin district headquaters atan Yachuli a ni dawn tih a sawi a, Bichom district chu East Kameng leh West Kameng district aṭanga piang chhuak tur niin, an headquaters chu Napangphung a nih tur thu a sawi bawk. Felix chuan cabinet ṭhukhawm chuan ramri ṭhen hran dan tur chu an ngaihtuah thu leh a chhunga chengte tana ṭha ber nia an hriat dan angin district thar pahnih ramri chu an siam thu leh, district thar pahnih hawn belh a nih avang hian sorkar hna 67 zet siam belh a ni, a ti.

Arunachal Pradesh cabinet ṭhukhawm hian Lokayukta (Amendment) Bill 2024 leh Amendment of the Arunachal Pradesh (Land Settlement and Records) Act 2000 (Act No. 10 of 2000) te an pawm bawk a, assembly session lo awm turah hian pharh an ni dawn a ni.