Manipur : Imagi Meira-ten Assembly House luhchilh

Manipur hmeichhe pawl pakhat, Imagi Meira chuan Thawhlehni khan Chingmeirong-a Manipur Legislative Assembly building chu an luhchilh a, an state chhung buainaah hmalakna mumal tak a awm theih nan house chu hma la turin an phut.

Imagi Meira convenor, Shanti chuan thuthar thehdarhtute a kawmnaah, an state tana a pawimawh em em laia winter assembly session koh a nih loh chhan a zawt. Lungawi lohna lantira pungkhawm, hmeichhe pawl member-te hian Imphal West district-a Keishampat hmuna BJP office an luhchilh bawk. BJP President A. Sarda Devi chu an zawhna neih chhang turin an phut a ni.

Lungawilohna lantirtute hian buaina lian tham siam lo mah se venghimtute nen erawh an inhnial buai a ni. Imagi Meira zinga pakhat chuan Speaker leh MLA dangte hmuh an lo tum tawh thu sawiin, state chhunga an awm remchan lai a nih loh avanga an hmuh theih loh thu leh, tunah chuan Manipur a an lo let leh tawh avangin an zawhna neih chhanna bakah hmalakna mumal tak a awm an duh thu a sawi a ni. Imagi Meira-te lungawilohna lantir dang tur hian venghimtu lam techu Manipur Legislative Assembly bakah BJP head office ah tirh luh belh an ni.

Imagi Meira pawl hian a hma pawhin assembly house bakah BJP office bearers ṭhenkhat in an lo hual tawh ṭhin a ni. An zinga tam tak chu police pawhin lo man tawh mah se an thilphut tihhlawhtlin ngei an tum avangin tawp san mai an tum lo tih an sawi. An pawl chuan an thil phut chungchanga mi pawimawh leh thiltithei hmuh an duh thu sawiin, chumi a hlawhtlin hma chu an lungawilohna lantir chhunzawm zel an tum.

Manipur Technical University zirlaiten lungawilohna lantir

Manipur Technical University-in online leh offline hmanga exam buatsaih a tumna chu zirlaiten duh loin, Thawhlehni khan administrative block an luhchilh. Zirlai tam tak chu campus chhungah pungkhawmin, offline exam chu boycott turin thutlukna an siam a ni.

Zirlaite hian offline leh online hmanga exam buatsaih hi zirlai ṭhenkhat tan a ṭhalo nia ngaiin zirlai zawng zawng chu angkhat a enkawl vek an phut a ni. Zirlai zawng zawng chu exam dan thuhmuna an exam vek a ngaih thu an sawi a, chutiang nilo a exam kalpui a nih chuan zirlai ṭhenkhat tan pass ṭhat a har phah dawn niin an sawi.

Lungawilohna lantirtu zinga tel ve zirlai hruaitu pakhat chuan an state chhung buaina avang hian hnam hrang hrang zirlaite chuan harsatna an tawh thu a sawi a, exam chu dan pangngai anga neih ni se tih chu an duh ber a ni tih a sawi. Chutianga ni lo a, online leh offline hmanga buatsaih kawp a nih erawh chuan zirlai ṭhenkhat tan hamṭhatna a tam dawn bik niin a sawi a ni.