Sorkarin Bru refugee-te tan Rs vbch 600 ruahman

Sorkar laipui, Tripura leh Mizoram state sorkarten Tri­pura-a Bru raltlante awmhlenna tura inremna an ziah hnuah, union home minister Amit Shah chuan Bru ho awmna tur leh an hmasawnna tur ngaihtuahna turin sorkar laipui chuan cheng vaibelchhe 600 vel a ruahman tih a sawi. 

Amit Shah chuan inremna an siam hnuaiah hian Bru raltlan 34,000 vel chu Tripura-ah hian an khawsa zui dawn tih a sawi a, heng mite hi state mi leh sa pangngaiten chanvo an neih angte pek ve vek an ni dawn a, sorkar laipui leh state sorkar hnuaia social welfare scheme hrang hrangte pawh an chhawr ve thei vek dawn a ni, a ti. 

Home ministry thuchhuah chuan, Bru refugee chungchanga inremna siam chu prime minister Narendra Modi-a'n hmarchhak tihmasawnna tura a hmathlir lo neihte nen pawha inzul tak a ni tih a tarlang. Inremna an siam hnuaiah, Bru refugee chhungkaw tin hi an chenna tur ram sq ft 40 x30 a zau pek a ni dawn a, a hmaa an lo sawi tawh angin an account-ah fixed deposit Rs nuai 4 bakah kum hnih chhung thla tin Rs 5,000 dahsak an ni dawn bawk. Kum hnih chhung ration a thlawna pek niin, in sak ṭanpuina Rs nuai 1.5 pek an ni bawk ang. 

Prime minister Narendra Modi pawhin Tripura-a Bru refugee te awm nghehna tura inremna siam a ni ta chu lawmawm a tih thu sawiin, Bru-te chuan hamṭhatna hrang hrang an dawng thei dawn tih a sawi. A kaihhruai sorkar chuan hmarchhak state leh a mi chengte hmasawnna chu a ngai pawimawh hle tih a sawi a ni.