Nagaland : Wokha district-ah tiamchin awm loin bandh huaihawt

Nagaland-a Lotha hnam chuan vawiin aṭangin Wokha district huam chhunga national highway-ah tiam chin awm loin total bandh an huaihawt dawn.

Bandh huaihawt hian Wokha district chhunga NH-2, km 74.40- 83 inkar a huam dawn a, tukin zing 6 aṭangin bandh hi an nei ṭan ang.

Wokha district-a civil society organisation hrang hrang intelkhawmte chuan NH-2 two lane siam hna hi thawk thuai turin thuneitute an lo nawr fo tawh a, mahse an nawr anga hna hi thawh ṭan a nih mai loh avangin lungawi lohna hi an lantir ta a ni. Wokha Deputy Commissioner hnenah pawh ni nga chhunga hma la turin hriattirna an lo pe tawh a, mahse an hun pek chhunga hmalakna engmah a awm loh avangin bandh hi an huaihawt ta a ni.

Lungawilohna lantirtu pawl hrang hrang te hi - Lotha Hoho, Lotha Eloe Hoho, Lotha Students’ Union, Wokha District Village Council Chairman Association, Joint Action Committee, Wokha Town Colonies Chairmen Union leh All Commercial Vehicle Association Wokha te an ni. Nawrh huaihawttute hian Naga mipuite chu an lungawiloh chhan hriatthiam pui tura an duh bakah, kawng ṭha an neih theih nana bandh an huaihawt chu thlawp turin an duh thu an sawi.