Assam CM-in FMR tihtawp a thlawp

Union home minister Amit Shah chuan Ningani khan North-east huam chhunga India leh Myanmar-in ramria inkalpawhna chungchanga inremna an neih, Free Movement Regime (FMR) chu tihtawp a nih thu X-ah a tarlang.

Assam chief minister, Himanta Biswa Sarma chuan Home Ministry-in FMR tihtawp an rel chu a thlawp thu leh ṭha a tih thu a sawi ve nghal. Sarma chuan, "India him nan thutlukna pawimawh tak siam a ni leh ta! FMR titawp tura Home Minister Amit Shah hmalakna ka fak a, hei bakah, India leh Myanmar ramri hung hna thawh mek pawh sawi hmaih theih a ni lo. Heng hmalakna hian hmarchhak biala helna leh lut ru tam tak a veng dawn a ni," tiin a sawi.

Home minister Amit Shah hian prime miniter Narendra Modi kaihhruai sorkar hnuaiah thil ṭha a chhuah zel thu tarlangin, ram chhung himna kaihhnawihah thutlukna siam a ngaih avangin, home ministry-in FMR chu an tihtawp thu a sawi. FMR titawp tura Ministry of External Affairs-in hma an lak mek karah, hmarchhak biala India state-te dinhmun ṭhat leh him zawk nana thutlukna chu siam an nih thu a tarlang.

Amit Shah hian India leh Myanmar ramri hung mek a nih thu leh, Manipur-a Moreh-ah chuan eng emaw zat hung a nih tawh thu te, project kal mek pahnih a awm thu leh, India leh Myanmar ramri zawng zawng chu hung vek a, FMR tihtawp a nih tur thu hi a lo sawi tawh a ni.