Rorel lai SKM-in voter lem an nei niin Bhaichung-a'n puh

Sikkim-a eptu party Sikkim Democratic Front (SDF) hruaitu, Bhaichung Bhutia chuan Sikkim-a rorel lai, chief minister Prem Singh Tamang kaihhruai Sikkim Krantikari Morcha (SKM) chu 2019 inthlana state pawn aṭanga voter lem la lutah a puh.

SDF vice-president atana thlan thar, Bhaichung Bhutia hian nimin khan press mite kawmin, heng voter lemte hi Sikkim-a an awm theih nan hre miah loin a lo ṭanpui thu a sawi. "2019-a Hamro Sikkim Party-a ka awm lai khan SKM hi kan lo thlawp a, state pawn aṭangin voter lem an lo hruai lut a ni. Tan in aṭanga Chief Minister Golay a lo chhuah khan kan kal khawmna reng rengah voter lemte kha tam tak an lo awm a ni," a ti.

Bhaichung Bhutia hian SKM chu pawisa hmanga voter lei leh, chung voter an leite chu Sikkim pawn lam mi, a lem an nih thu sawiin, Sikkim-a voter awm zat chu 28,000 zeta a pun thu a sawi a ni.

Bhutia hian SDF aṭang erawh chuan hetianga voter lem an awm lohna tur atan dik tak leh khauh taka residential certificate leh certification of identification an kalpui tur thu a sawi. "Sikkim-ah hian damdawi lam thiam aṭang leh company dang aṭang pawhin lo lut an tam hle a, hnathawh phalna mumal tak siam a ni ang. Heng voter lemte hian vote neitu dik takte dinhmun a tichhia a, One Nation, One Ration card scheme hian a nghawng zel bawk a ni. He scheme hmang hian an chhungte an lo hruai lut zel si a. Heng zawng zawng hi dan siam ṭhat hmangin SDF hian a siam ṭha thei a ni," tiin a tarlang.