Meghalaya : Emergency-a koh ṭhin medical hnathawkte hlawh tipung dawn

Meghalaya health minister Ampareen Lyngdoh chuan medical hna thawk zinga emergency-a koh leh kal ṭhin, Emergency Management and Research Institute (EMRI) workers union nen meeting neiin, EMRI workers union te'n rei tak an lo phut leh beisei tawh 6%-a an hlawh pun chu pawm a nih thu leh, hlawh thar chu hman vat a nih tur thu a sawi.

Meghalaya EMRI workers union president, Roypar Kharaswai chuan seniority a zirin, a hniam bera 6%-a an hlawh tihpunna tur sorkarin a pawm chu an lawm thu leh a lungawithlak thu a sawi. Sorkar thutlukna chu member zawng zawngin general meeting an neiha an pawm thu leh an pawlah chuan Meghalaya emergency 108 hnuaia chhawr mi 300 lai an awm thu a sawi bawk.

Health minister Lyngdoh chuan EMRI workers union-in rang taka hma lak tura memorandum an rawn theh luh thu sawiin,"Increment tang chungchanga inbiakna neih chu kan sawi hmasa ber a, hei hi National Health Mission (NHM)-in an hnuaia thawkte an en zui loh vang a ni," a ti. Hetih lai hian Lyngdoh hian Meghalaya state emergency 108 chu a enkawltu tur chungchangah thil la tihfel loh a awm thu leh, inenkawl leh an bungruate hlan a, hlawh punna lam pawh tifel tur chuan 108 enkawltu tur hi zawn fel vat a ngai a ni, a ti.