Singapore-ah taxi driver, food delivery worker leh hawker-te A thlawnin Covid-19 test tihsak dawn

Singapore ministry of health (MOH) chuan an rama taxi driver, food delivery worker leh hawker-te tan Covid-19 test ngai an awm chuan a thlawna an test sak dawn thu a tarlang.

Heng hna thawktute hi a thlawna test neih pui tum a nih chhan ber chu an sumdawnna hmun hi hri kai theihna a san bik vang a ni a, anmahni dawrtu mipui aṭanga awlsam taka an kai theih vangin, sorkar chuan an tan bik hian a thlawna test-na a ruahman sak a ni. Sorkar chuan heng mite tana test man chu a tum sak vek dawn a, nitina eichawp zawng an nih avangin ngaihtuah an ngaih thu MOH chuan a tarlang bawk. 

Pathianni khan Singapore-ah Covid-19 hri kai thar mi 54 an awm a, heng zinga mi pariat chu tualchhung mi an ni a, a dang mi pasarih chu ram pawn aṭang lut te an ni. Anni bakah hian a dang zawng chu nitina inhlawh fa taxi driver, food delivery worker leh hawker-te an ni.

Singapore-a Covid-19 hri kai hi mi 56,771 an awm tling tawh a, heng zinga mi 55,586 chu enkawl dam tawh niin, thi hi mi 27 an awm tawh a ni. Hri kai enkawl lai mek hi mi 1,158 an awm.

MOH chuan hmaituamna pangngai aia an hman ṭhin bandana, scarve leh neck gaiter-te chu hmang tawh lo turin mipuite chu a hriat nawn tir a, multi-ministry task force ten hmaituamna hman tura an sawi chu hmang turin mipuite a ngen. 

Hong Kong-ah pawh sorkarin hri darh tur venna atan vawiin aṭanga hman ṭan turin free universal coronavirus test programme a siam. 

A thlawna test neih duh te tan online hmanga in register theih a ni a, khawpui chhungah test-na tur hmun 80 siam a ni bawk. Nimin thleng khan free test nei tura inziak lut hi mi 4,20,000 an awm tawh. 

Pathianni khan Hong Kong-ah hian hri kai hmuh thar 15 awm lehin, mi pakhatin an thihpui bawk a ni. Mainland China-ah pawh hri kai hmuh thar 17 an awm leh bawk.