Assam-a hri kai punnain ziaawm lam pan ṭan : Health minister

Assam education and health minister Himanta Biswa Sarma chuan an state chhunga hri kai punna chuan ziaawm lam a pan ṭan niin a sawi. 

Minister chuan a hma chuan hri kai hi ni 11 chhungin a letin an pung hman a, a hnuah ni 15 hnuah ni lehin, tunah chuan ni 17 hnuah te a ni tawh a ni.  Assam-ah kai hmuh chhuah tawh hle mah se, hri thihpui zat hi 0.25% a nih thu a sawi bawk. 

Sarma chuan state chhunga test aṭanga hri kai hmuh chhuah, positive rate chu 4-5% vel a ni tih sawiin, health department chuan ni khatah sample 50,000 te a test a ni, a ti. Test rate lamah India rama a sang ber an ni thuai dawn tih a sawi bawk. 

State chhunga zirna in hrang hrangte chu September 1 aṭanga hawn turin an inpeih tawh tih sawiin,  mahse union home minis­try thuchhuak an nghak dawn tih minister chuan a sawi. Zirtirtu leh school-a thawk zawng zawngte chu August 21-30 chhungin Covid-19 test neih sak vek an ni ang, a ti. An result negative-te chauhin an hna hi an thawk chhunzawm rih ang. Result negative ni se, hnaa kal lote chu 'on leave without pay' anga kal tir an ni dawn tih a sawi. 

Hripui leng vanga hun rei tak zirna pangngai chhunzawm theih loha a awm avangin state sorkar chuan Secondary Education Board of Assam leh Assam Higher Secondary Education Council hnenah kumin atan bik syllabus titlem tura a ngen thu minister chuan a tarlang. Assam bakah ram chhung hmun dangah pawh March thla aṭang khan  zirna inte hi khar an ni tawh a ni. Assam-ah hian Covid-19 kai hmuh chhuah tawh hi mi 82,201 an ni tawh a, an zinga 56,734 chu enkawl dam an ni tawh. Hripui vang hian mi 203 an thi tawh bawk.