Nagaland : Parliamentary committee-in Nagaland tan high court hran rawt

Parliamentary standing committee on personnel, public grievances, law and justice chuan Judicial Infrastructure in the North-Eastern States of India topic hmanga report a pek vawi 141-na tichhuakin, report-ah hian Nagaland tana high court hran dinna tur rawtna a siam.

Committee hian Kohima Bar Association pawhin high court hran dinna tur hian dilna an lo theh luh tawh thu sawiin, an dilna hi committee chuan,"Nagaland tana high court hran neih an rawn dilna hi ngaihtuahin thil ṭul leh dik niin a lang a, an dilna tihlawhtling tur hian ministry of law and justice leh ministry of home affairs te'n an ngaihtuah a ngai a ni," tih chu an ngaihdan a nih thu an tarlang.

Parliamentary committee hian Nagaland tana high court hran neih rawtna a siam bakah hian northeast state hrang hranga court hmunhmate chu a ṭhat tawk loh thu an sawi."Northeast-a rorelna kalpuina hmunte hi sawi fiah theih dan berah chuan hnathawh kal lai mek tiin a sawi theih ang. Hna thawh tur a la tam hle a, a dinhmun dik tak thleng tura thil ṭul a la tam em em a ni," an ti.

Bar & Bench tarlan danin parliamentary committee hian northeast-a centrally sponsored scheme ṭanpuina chu tihtam ṭul a tih thu an tarlang a, hei hi court hmunhma tihchangtlunna atan a ni. Financial year 2022-2023 chhung pawh khan pawisa hman bang la awm avangin Nagaland leh Mizoram tan fund pek chhuah a ni lo niin an tarlang. Meghalaya tan erawh Rs vbc 50 pek chhuah niin, anni hian an fund hi an hmang zo vek thung.