Meghalaya : Iewduh bazar chei thatna turin Rs. vbc 10 chuang pawm pawm

Meghalaya khawpui, Shillong-a bazar hmun pawimawh leh hlun tawh tak, Iewduh market chu chei ṭhat tura ruahmanna siam a ni. Iewduh market chei leh siam that nan hian North Eastern Council (NEC) chuan Rs. vbc 10 chuang a pe dawn a ni.

NEC secretary, K Moses Challai chuan,"NEC hian kan huam chhunga bazar hlui tawh, rei tawh leh ṭha pangngaite pawh cheiin kan siam ṭha dawn a ni. Bazar-na hmunhma zawng zawng kan siam ṭha vek ang," tiin, DPR an zir chian mek thu leh, Rs. vbc. 10 atanga 11 inkar a nih thute a tarlang. NEC hian Iewduh market chei ṭhatna tur hi pawm tawh mah se, pawisa erawh pek chhuah a la ni lo thung.

Iewduh market chei ṭhat hna hi thla hnih hnuah chuan ṭan theih tawh tura ruahman a ni a, Challai hian he bazar hmun hian pipe phum dan chungchang bakah footpath siam aṭanga mamawh chi hrang hrang a ngah thu a sawi.