Manipur HM-in truck driver-te hnenah medical kits sem
Manipur health minister Langpoklakpam Jayanta-kumar Singh chuan state dang aṭanga lut truck driver-te hnenah medical kits a sem.
Minister hian Imphal-Jiribam kawnga tlan, truck driver leh handyman-te chu sanitizer, face mask, shield leh thildangte a sem a ni. Hemi rual hian lockdown puan chhunga an state mamawh phurh luh saktu, driver-te chu fakin, huaisen taka an hnathawhna avangin lawmthu a hrilh.
Manipur-ah hian Thawhlehni khan hri kai hmuh chhuah belh mi 78 an awm leh a, anni nen hian hri kai hmuh tawh hi 4,765 an tling tawh a ni. Hri kai hmuh tawh zingah hian Central Armed Police Force mi leh sa 1,221 an tel. Hri kai zinga 2,789 chu enkawl dam ni tawhin, recovery rate hi 58.53% a ni. Mi 18 in an thihpui tawh thung a ni.